Конечно некои од моите постови допреа до Бутелските општинари, штом така бурно и импулсивно ми оставија километарски коментар на мојот текст ,,Како лобира општина Бутел за Аквадуктот".

Драги Бутелски општинари, очигледно сте промашиле нешто во мојата концепција, бидејќи мене целта на лобирањето не ми е  веб страницата на одредена општинска државна администрација (во случајов на општина Бутел), туку културното наследство кое се наоѓа во нејзини рамки, и и е доделено да се грижи за него.

Како прво не знам дали сте вие свесни какво богатство ви е дадено да управувате со него? Тоа е придобивка која не ви припаѓа само вам, туку на целиот свет. И светот и те како има право да знае што се случува со колективното културно наследство. Дали вие знаете низ колку општини поминува Кинескиот ѕид? Мислите дека се поважни општините или една општоцивилизациска придобивка која постоела пред постанокот на некои од нив, а ќе постои и откако ќе ги нема. Така да разговорот за вашата  web страна го завршувам по кратка постапка бидејќи има работи кои се поважни од интернет сајт на една административна општина.

Секако дека за многу работи во врска со Аквадуктот сум во право. Посебно од археолошка гледна точка.  Би сакала да знам кои погрешни информации јас сум ги употребила (нагласувам - за Аквадуктот, сајтот ве интересира само вас) за моите заклучоци, бидејќи користам информации од извори кои ги линкам во оригинал, и за секоја пропратна аномалија би требало да се обратите кај газдата кој ја пуштил таа информација во оптек на интернет. А заклучокот да ми го оставите на мене како единствено и непроменето автономно право над мојот интегритет.

Инаку немојте да очекувате кој знае какви коментари на блогот apropos овој пост, бидејќи јас и онака ретко ги добивам. Луѓето обично сакаат да ме читаат, но ретко коментираат.

Ви благодарам што сте поставиле линк од мојот блог на општинската страница и што се обидувате да бидете во тек со се што се пишува, а е поврзано за Аквадуктот. И јас ќе ве следам со особен интерес по однос на вашето делување во рамките на проектот за Скопскиот Аквадукт. Така да љубопитноста е обострана. :)

Немам обичај да реплицирам на анонимци и обично таквите коментари ги игнорирам или бришам, но нејсе, да се надеваме даке е ова коментар од еден ,,вистински" Бутелски општинар, a не од админот на нивниот web site.

Овој текст ќе биде уште едно надополнување во мојот серијал за Аквадуктот во Скопје. Фокусот на интересот го насочив кон симболот на една од скопските општини. Поточно, сакам да ви го свртам вниманието на еден од хералдичките симболи кои се наоѓаат  представени на грбот на општина Бутел.

Општина Бутел е новоформирана општина (произлезена од Општина Чаир) под територијата на град Скопје во неговиот краен северен дел. Градоначалник на општината е Петре Латиновски.  Како таква, според законите во РМ, таа би требало да добие свој грб и знаме. Не можам да спорам дали општините во Македонија вршат геноцид врз хералдиката бидејќи долго време кај нас не постоеше стручно тело за оваа област. Се надевам дека Македонското Хералдичко Здружение ќе ја пополни таа празнина.


Во овој контекст само ќе наведам четива за консултација за грбот на општина Бутел, кои по хронолошки ред ги пронајдов преку пребарувачот Најди, а вклучуваат статии од весници и текстови од блогови:

- Одлука за распишување конкурс за утврдување на грб и знаме на Општина Бутел 22.12.2005
- Бутел доби грб и знаме - 2006-03-21
- Идејно решение за грб и знаме на Општина Бутел - 2006-03-21
- Општините вршат геноцид врз хералдиката 2006-04-13
- Општина Бутел донесе разгледница место грб 2006-04-14
- Грбот на Општина Бутел не е според законските норми 2006-04-18
- Една пренесена реакција 2006-04-26
- Хералдиката победува 2006-05-01

Објаснувањето за идејно решение за грб и знаме на Општина Бутел гласи:

За грбот е употребен штит со засечена форма на која има подлога традиција во македонската хералдика. Централен елемент е аквадуктот, кој е еден од главните споменици во Македонија од римскиот период, а се наоѓа во непосредна близина на касарната "Илинден". Од левата страна на грбот, поставени се лозови лисје кои го симболизираат лозарското минато на овој дел од Скопје, а зад аквадуктот е прикажан планинскиот масив на Скопска Црна Гора. Изгревот на сонцето ја симболизира појавата на новата Општина Бутел. На идејното решение на знамето се присутни црвената и жолтата боја, а во нивниот пресек стои грбот на Општината.

Линк до написот

Вистинскиот клуч за старите култури го носиме во себе. Треба да го дадеме како сведоштво, за да остави печат на времето.

Дали сакаме Аквадуктот да ни се поклони до земја при нашата следна посета, рушејќи се притоа како кула од карти?